ដោយ : បន្ទាយ
បន្ទាយមនជ័យ ៖ដំណើរសង្រ្កាន្តបន្ទាយមានជ័យរយៈពេល៤ថ្ងៃ ដែលបានប្រារព្ធធ្វើឡើងនៅសួនតេជោ ឈ្នះ ឈ្នះ (វេទិកាខេត្ត) ចំកណ្តាលទីប្រជុំជនខេត្តក្នុងក្រុងសិរីសោភ័ណ ដែលមានបងប្អូនពលរដ្ឋនិងភ្ញៀវទេសចរឆ្លងកាត់មកចូលរួម កម្សាន្តសប្បាយយ៉ាងច្រើន ឬអាចនិយាយថា ក្នុងរយៈពេល៤ថ្ងៃ ក្នុងទូទាំងខេត្តមានសរុបជិត១លាននាក់លើពលរដ្ឋសរុបក្នុងខេត្តមានជាង៨៥ម៉ឺននាក់នោះ។
ពិធីបិទបញ្ចប់ នៅព្រលប់ងៃទី១៧ខែមេសាឆ្នាំ២០២៥ ប្រព្រឹត្តទៅ ក្រោមអធិបតីភាពលោកអ៊ុំ រាត្រី និង លោកស្រីជ័យ ណារី និងចូលរួមដោយមន្ត្រីថ្នាក់ដឹកនាំ មន្ត្រីអាជ្ញារ សមត្ថកិច្ច អ្នកពាក់ព័ន្ធជាច្រើន។
លោកអភិបាលខេត្តបានមានប្រសាសន៍ថា ក្រោមម្លប់នៃសុខសន្តិភាព ការអភិវឌ្ឍដែលជាសមិទ្ធផលនៃរាជរដ្ឋាភិបាលតាំងពីសម្តេចតេជោហ៊ុន សែន អតីតនាយករដ្ឋមន្ត្រីដល់បច្ចុប្បន្នដឹកនាំដោយដោយសម្តេចធិបតីហ៊ុន ម៉ាណែត នាយករដ្ឋមន្ត្រី សម្រាប់ខេត្តនេះ ក្នុងរយៈពេល ៤ថ្ងៃកន្លងមកនេះ ឃើញថា បងប្អូនពលរដ្ឋនិងភ្ញៀវទេសចរឆ្លងកាត់មកកម្សាន្តសប្បាយរីករាយយ៉ាងក្រៃលែង និងច្រើនសន្ធឹកសន្ធាប់។
ក្រៅពីល្បែងប្រជាប្រិយ ក៏មានការរាំលេង រួមជាមួយការបាញ់ទឹក ពពុះសាប៊ូ ប៉ាតម្សៅ ដោយរបៀបរៀបរយ សីលធម៌ សុជីវធម៌ សេចក្តីថ្លៃថ្នូរមិនប៉ះពាល់ទាស់ទែង បង្កបាតុភាពអ្វីឡើយ។ពិសេសជាងនេះទៀត ក៏មានការចូលរួម សហការពីក្រុមហ៊ុនSmart Phone និងបានអញ្ជើញ តារាល្បីៗ មកសំដែងកម្សាន្តផងដែរ។
ក្នុងឱកាសនោះផងដែរ លោកអ៊ុំ រាត្រី អភិបាលខេត្ត ក្នុងនាមរដ្ឋបាលខេត្តនិងជាប្រធានគណ:បញ្ជាការកងឯកភាពរដ្ឋបាលខេត្តបន្ទាយមានជ័យ សូមវាយតម្លៃខ្ពស់ កោតសរសើរ ជូនពរនិងថ្លែងអំណរអរគុណយ៉ាងជ្រាលជ្រៅចំពោះកងកម្លាំងគ្រប់ប្រភេទ ក៏ដូចជាមន្ត្រីអាជ្ញធរដែនដី សមត្ថកិច្ចគ្រប់មន្ទីរអង្គភាព យុវជនក្រុមការងារនៃអនុគណៈកម្មការពាក់ព័ន្ធទាំងឡាយដែលខិតខំបំពេញតួនាទី ភារកិច្ចបានយ៉ាងល្អ ក្នុងការរក្សានូវសន្តិសុខសុវត្ថិភាព សណ្តាប់ធ្នាប់សាធារណៈ និងការរៀបចំជូនដល់បងប្អូនប្រជាពលរដ្ឋមកលេងកម្សាន្តក្នុងថ្ងៃបុណ្យចូលឆ្នាំថ្មីខេត្តបន្ទាយមានជ័យ និងនៅតាមស្រុក មូលដ្ឋាន និងវត្តអារាមនានាទូទាំងខេត្ត ។ហើយនាឆ្នាំ២០២៦ រដ្ឋបាលខេត្តនឹងខិតខំរៀបចំឲ្យសង្រ្កាន្តបន្ទាយមានជ័យកាន់តែសប្បាយរីករាយ អធិកអធមជាងនេះទៀត។
ឆ្លៀតក្នុងឱកាសនេះ លោកសូមជូនសព្វសាធុកាពរជូនដល់កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋសូមទទួលបានពុទ្ធពរទាំង៤ប្រការគឺ អាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ៕
